]> Catullus XXIV Gaius Valerius Catullus O qui flosculus es Iuuentiorum, non horum modo, sed quot aut fuerunt aut posthac aliis erunt in annis, mallem diuitias Midae dedisses isti, cui neque seruus est neque arca, quam sic te sineres ab illo amari. 'qui? non est homo bellus?' inquies. est; sed bello huic neque seruus est neque arca. hoc tu quam lubet abice eleuaque; nec seruum tamen ille habet neque arcam.