]> Catullus LVIIIb Gaius Valerius Catullus Non custos si fingar ille Cretum, non Ladas ego pinnipesue Perseus, non si Pegaseo ferar uolatu, non Rhesi niueae citaeque bigae; adde huc plumipedas uolatilesque, uentorumque simul require cursum, quos iunctos, Cameri, mihi dicares: defessus tamen omnibus medullis et multis languoribus peresus essem te mihi, amice, quaeritando.