Horace Book III Ode XVII Quintus Horatius Flaccus Aeli vetusto nobilis ab Lamo, Quando et priores hinc Lamias ferunt Denominatos et nepotum Per memores genus omne fastus Auctore ab illo ducis originem, Qui Formiarum moenia dicitur Princeps et innantem Maricae Litoribus tenuisse Lirim Late tyrannus: cras foliis nemus Multis et alga litus inutili Demissa tempestas ab Euro Sternet, aquae nisi fallit augur Annosa cornix: dum potes, aridum Compone lignum: cras genium mero Curabis et porco bimenstri Cum famulis operum solutis.