Horace Book III Ode XXV Quintus Horatius Flaccus Quo me, Bacche, rapis tui Plenum? Quae nemora aut quos agor in specus, Velox mente nova? Quibus Antris egregii Caesaris audiar Aeternum meditans decus Stellis inserere et consilio Iovis? Dicam insigne, recens, adhuc Indictum ore alio. Non secus in iugis Exsomnis stupet Euhias Hebrum prospiciens et nive candidam Thracen ac pede barbaro Lustratam Rhodopen, ut mihi devio Ripas et vacuum nemus Mirari libet. 0 Naiadum potens Baccharumque valentium Proceras manibus vertere fraxinos, Nil parvum aut humili modo, Nil mortale loquar. Dulce periculum est, 0 Lenaee, sequi deum Cingentem viridi tempora pampino.