Horace Book IV Ode III Quintus Horatius Flaccus Quem tu, Melpomene, semel Nascentem placido lumine videris, Illum non labor Isthmius Clarabit pugilem, non equus impiger Curru ducet Achaico Victorem, neque res bellica Deliis Ornatum foliis ducem, Quod regum tumidas contuderit minas, Ostendet Capitolio; Sed quae Tibur aquae fertile praefluunt Et spissae nemorum comae Fingent Aeolio carmine nobilem. Romae principis urbium Dignatur suboles inter amabiles Vatum ponere me choros, Et iam dente minus mordeor invido. 0 testudinis aureae Dulcem quae strepitum, Pieri, temperas, 0 mutis quoque piscibus Donatura cycni, si libeat, sonum, Totum muneris hoc tui est, Quod monstror digito praetereuntium Romanae fidicen lyrae: Quod spiro et placeo, si placeo, tuum est.