Horace Book I Ode XIV Quintus Horatius Flaccus O navis, referent in mare te novi Fluctus. O quid agis! Fortiter occupa Portum. Nonne vides, ut Nudum remigo latus Et malus celeri saucius Africo Antemnaeque gemant, ac sine funibus Vix durare carinae Possint imperiosius Aequor? Non tibi sunt integra lintea, Non di, quos iterum pressa voces malo. Quamvis Pontica pinus, Silvae filia nobilis, Iactes et genus et nomen inutile, Nil pictis timidus navita puppibus Fidit. Tu, nisi ventis Debes ludibrium, cave. Nuper sollicitum quae nihi taedium, Nunc desiderium curaque non levis, Interfusa nitentis Vites aequora Cycladas.