Horace Book I Ode XVII Quintus Horatius Flaccus Velox amoenum saepe Lucretilem Mutat Lyeaeo Faunus et igneam Defendit aestatem capellis Usque meis pluviosque ventos. Impune tutum per nemus arbutos Quaerunt latentis et thyma deviae Olentis uxores mariti, Nec viridis metuunt colubras Nec Martialis haediliae lupos, Utcumque dulci, Tyndari, fistula Valles et Usticae cubantis Levia personuere saxa. Di me tuentur, dis pietas mea Et Musa cordist. Hic tibi copia Manabit ad plenum benigno Ruris honorum opulenta cornu. Hic in reducta valle Caniculae Vitabis aestus et fide Teia Dices laborantis in uno Penelopen vitreamque Circen; Hic innocentis pocula Lesbii Duces sub umbra, nec Semeleius Cum Marte confundet Thyoneus Proelia, nec metues protervum Suspecta Cyrum, ne male dispari Incontinentis iniciat manus Et scindat haerentem coronam Crinibus immeritamque vestem.