Horace Book I Ode XXXII Quintus Horatius Flaccus Poscimur. Siquid vacui sub umbra Lusimus tecum, quod et hunc in annum Vivat et pluris, age dic Latinum, Barbite, carmen, Lesbio primum modulate civi, Qui ferox bello tamen inter arma, Sive iactatam religarat udo Litore navim, Liberum et Musas Veneremque et illi Semper haerentem puerum canebat, Et Lycum nigris oculis nigroque Crine decorum. 0 decus Phoebi et dapibus supremi Grata testudo Iovis, o laborum Dulce lenimen, medicumque, salve Rite vocanti!